Act 25 | BEF | STEP | Analo Fesitasiu loegi monegi yupahi mino koloto alihi Yelusale hepatoga bu'ehina yabe.

Acts 25

Sisau Lomu kibina bouba ka'ni kehelilibe luto Polu kehe i'ehina

1 Analo Fesitasiu loegi monegi yupahi mino koloto alihi Yelusale hepatoga bu'ehina yabe. 2 Ya higo analo mono noto kaba bona'i hiti to Yuta olopa bona'i hiti aitoga bite Polu kumu amuya melete fisa ite ma lite Fesitasihi buka tite lu emi'ahana: 3 Kai bati huto lehe'moto Poluhi ho lifitogo Yelusale hepatoga eno. To hena'mugope, enali kapoga kofohi melete gimi gi'ehite ho fililune'mu nehite yabe. 4 To Fesitasiu ka'anilo nona'a lu epi'ehina: Polu nagalugu Sisalia nohinagi nani hupamone kanasi nohuto anaga biluna'mu yabe. 5 Ya hiluna'mu yagi olopa botini enele'mo he'minogo nani hiti limite ana bouba ana'ina mone li sibina hu'ehifi fisa ilabe.

6 Fesitasiu luga'a kana nesi'a enali hiti minoloto Sisalia bu'ehina. Eteka'a ka foya lilata nonugu tito minoloto Poluhi le'mete tilo luto enoho lifi'ehina. 7 Ya higo Poluhi le'mete tilago Yuta bona'i Yelusale hepatoti limi'ahanamagi le'mo bego hilete kaga fato fato'i lu etete fisa i'ahana to ka hapa'a mone ya kaga'mu yabe lite lu hokolo mehi'ahana. 8 Ya hago Polu gufa'a li buto bito ka'anilo nona'a ma luto lu epi'ehina: Nani Yuta bona'magi Keya ka'ani li gofa hola to sipi mono nohi li sibina hula to Lomu sipi gamanimofihi kaga lu sibina hula mehu'ohube luto lu'ehina. 9 Ya ligo Fesitasiu Yuta bona'magi bati bo yabe lite nofokehi halabe luto ekesa keheliloto enalitoga moloto Poluhi loka ho'ehina: Ya'ma kifisa neina kaga Yelusale hepato me'animoya anaga tito nani nubulo ho titogo ka foya li ketalabe luto nokehelipihe? 10 Ya luto loka hago Polu ka'alo nona'a lu emi'ehina: Nani nifisa ise hepa'i ni'inalo sipi Lomu gamani bomofihi bulo maga ho ti'ohube. To nani Yuta bonatoga nani foipana mone li huto mehu'ohunaya kaika akeheli bati hu'ahana. 11 To nani foipana lito ni'ifi to filise suhi luto ana'ina mone li sibina hu'ehinogo'nimo ya bati hite noho fililabe. To enali nifisa neina kamofihi hapa'a meni'inogomo bo moneuba nayato lito meepilina'mu yabe. Nani sipi gihiti bo Sisahi kehe inogo'ni kaga'ni kehelilina'mu yabe luto Polu lu emi'ehina. 12 Ya luto ligo Fesitasiu kanisole bona'a hiti ka lu kehelilete Poluhi ma luto lu emi'ehina: Kai sipi gamani bo Sisau kaga'ni kehelilibe latagi kai bati huto Sisahi bulo buto ho tilane.

Fesitasiu Polu kumu Agilipahi loka ho'ehina

13 Alihi kanagu kibina bo Agilipa hiti to liha'a Benisi hiti Fesitasihi Sisalia hepato ete be tigi'aha'ina. 14 Etali nesi'a kana ana hepato minela'igo Fesitasiu Poluhi kaga'mu kibina bomofihi lu emi'ehina: Bo mone maga Felikiu naga nonugu he'mi eto'ehina nohibe. 15 To nani Yelusale hepato bu'ohugo Yuta mono nohi kaba hulata bona'i hiti to olopa bona'magi hiti ya'mana bomofihi kaga'a lu nimite fisa ite ho filibo lite nogo'na bi'ahana yabe. 16 Ya lago nani ka'anilo nona'a ma luto lu'ohuna: Lali Lomu bona'magita hapatiya bo mone'mofihi fa'mene fisa ilata menohune. Bo mone'mofitoga kaga ni'igomo yata'a ka foya lu epololata bomofihi bulo ho tigo lali geba hu'ohunogo ana bouba kaga fisa neinamofihi keheli bati hulata nohibe. 17 Ya hilete enali maga moneka nani'ni hiti nehetito nani yatama kana memino'ohube. Eteka'a ka foya lilata nonugu nani minoloto'ni ana bo le'mete tilo luto enoho lifi'ohube. 18 Enali kaga fisa neina bona'i ho ti'ahanaya to enali ana'ina foipana li huto hu'ehina mone ni'ina lu huto hilafi luto keheluna enali lu huto mehi'ahana yabe. 19 Enali mono kamu'i lite ka emekila to bo mone fili'ehinamofihi gi'a Yesu aku'i ho tito nohibe luto Polu nolina kamu'i hiti yabe. 20 To nani ya'mana kagalo nekesa yigi yigi huna hapa'a keheli bati mehuto'ni ma luto loka ho'ohuna: Kai Yelusale bitogo nani kagaka keheliluna bati hutofihe? 21 Ya lugo Polu kaga'nilo nona'a lu'ehina: Nani nagalugu nohinogo'ni alihi sipi gihiti bo Sisau kaga'ni kehelilina'mu yabe. Ya ligo nagalugu bite he'mi etenogo nohinogo alihi kana'agu Sisatoga ho lifilube. 22 Ya luto ligo Agilipau Fesitasihi ma luto lu emi'ehina: Nani'ni ya'ma bomofihi kaga'a keheliluna'mu yabe lu'ehina. Ya ligo Fesitasiu yago etehi kaga keheli etalane luto lu'ehina yabe.

23 Ya ligo kelete eteka'a Agilipaugo Benisiugo etali gukete hekolo bati hite be gete he'mite hilete e'aha'ina. Etali ana hepato gimi bo hiti to olopa bona'i hiti tutuma nonugu tite minelete Fesitasiu Poluhi le'mete tilo luto kehe igo le'mete ti'ahana. 24 Ya hilago Fesitasiu lu'ehina: Kigibina bo, Agilipao, to asaga bona'i malo lali hiti nehanamagita lenali ya'ma bo bu galo. Asaga Yuta boana'i Yelusale nehanamagifi to maga nehanamagi hiti enali ai'i nani bulo fisa i'ahana. To enali sipi kehe ite ai meminalina'mu yabe lite ho filibo li'ahana. 25 To nani ma bo bu go'ohuna ai fililina'a li huto mehu'ehibe. To ai'a sipi gihiti bo Sisau kaga'ni kehelilibe luto lu'ehigo nani ho lifinogo'ni bilibe luto nekesa yigi'ohuna yabe. 26 To ailuguti kaga bati hina'a sipi gamani bomofitoga fayahi genogo'ni bilina'a meli'ohuna. Ya'mu luto kigibina bo Agilipao, kai kubulo hiti enali enubulo hiti ya'ma bo le'moto noobe. Lali asaga'i kaga keheli bati hulototi nani alihi ka hapa'a lito mone fayahi galube. 27 To nani nagalugu nohina bo mone'mofihi fisa ite kaga li'ahana'a fayanugu megose ho lifinogo'ni bilinaya bati mehilina'mu yabe luto ya'ma Fesitasiu luloto lu'ehina.